قال رئيس "التيار الوطني الحر" النائب جبران باسيل
"اليوم نعمل على قانون لامركزية موسّعة يصحّح الإنماء المناطقي، وقانون صندوق
ائتماني يصحّح الإنماء الوطني، ومع مشروع بناء الدولة بيصير عنا منظومة قوانين ونظام
بتسمح للبنانيين يعيشوا برفاهية وبكرامة بدل الذلّ والمهانة يلّي عم يعيشوهم على يد
منظومة الفساد".
ولفت باسيل خلال عشاء التيار الوطني الحر في كسروان، إلى
أنه "إذا كان مقياس الأحجام السياسية هو محبّة الناس، فأكيد انّو الجنرال ميشال
عون كسر مقاييس المحبّة بينه وبين الناس بكسروان الفتوح: هون المحبّة ما لها زمن ولا
حدود، وهون العماد عون احتلّ القلوب وعمل نايب عن المنطقة، ومن هون بلّش بالـ 2005
معركة استعادة التوازن والشراكة... احتلّ القلوب واحتل المقاعد الخمسة، من دون خدمات،
وبرهن انّو كسروان ما بتمشي بس بالخدمات، وما بتعتبر غريب يلّي مش من منطقتها اذا كان
قريب من فكرها السياسي ووجدانها الوطني".
وأضاف "تخيّلوا شو يعني كسروان وجبيل وعكار والبقاع
والجنوب ما يعودوا ناطرين لتتكرّم عليهم المالية وتدفع لهم عائداتهم ويصيروا هم قادرين
يأمنوا لحالهم حل للنفايات والطرق والطاقة المتجدّدة، عم تتخيّلوا شو يعني ما يعود
بدّنا المالية تبتز، لتدفع للمتعهّد حقوقه ليبني معمل كهرباء او محطّة غاز؟".
ولفت إلى أن "التيار بمكان والمنظومة بمكان آخر، افتروا
بحقّنا وحمّلونا فسادهم، والآن بدات تظهر الحقائق أولاً بالقضاء الأوروبي، وقريباً
بالقضاء الأميركي، وبعدها بالتدقيق الجنائي وانشاءالله لا تكمل إلاّ بالقضاء اللبناني.
صدر من كم يوم، بعد تأخير 10 أشهر، وعرقلة سنتين، تقرير الفاريز ومرسال، وعلى الرغم
من اختفاء أجزاء منه وبنيانه على معلومات ناقصة، بدأت تنكشف أرقام وأسماء وشكّل ادانة
علنية للمجرم المالي رياض سلامة ومنظومته المالية والسياسية، ولفت إلى أن تقرير الفاريز
هو رأس جبل الجليد وهو البداية ونحن مكمّلين، لنا الفخر أن العماد عون أوّل من طالب
بالتدقيق الجنائي من فرنسا سنة 1998، وبدا نضاله السياسي من أجله سنة 2005 حتى توقّع
بالـ 2021. وفخرنا أنّ الوزير السابق منصور بطيش، ابن كسروان، هو أوّل من فضح الفجوة
المالية بمصرف لبنان وجريمة الهندسات المالية بـ 4 نيسان 2019. ولنا الشرف اليوم إننا
نريد استكمال التدقيق الجنائي بمصرف لبنان وبباقي المؤسسات والادارات واوّلها وزارة
الطاقة".
وأشار التيار إلى أن "رياض سلامة سرق شعب ولم يرفّ له
جفن، والمستفيدين من رياض أقلامهم الصفراء متل وجوههم، وكلماتهم السوداء متل نواياهم،
ما توقفت تشوّه الحقيقة وتضلّل الناس وتتهم التيار بالانهيار. وسوف نبقى نلاحقهم،
"بنكرجيي" وسياسيين واعلاميين وقضاة أمام القضاء اللبناني والدولي وأمام
الجمعيات والمنظمات الخارجية، وبالبرلمان اللبناني، لنعرف مين وقدّيش استفاد كل واحد
من الهندسات، ومين وقدّيش حوّل كل واحد مصرياته لبرّا بالوقت يلّي شعب بكامله ما قدر
يسحب شي من امواله".
وأضاف قائلا: "كل مورد وثروة بالبلد أمانة برقبتنا،
النفط والغاز أمانتنا وحافظنا عليهم لليوم، ولن نتركهم بأيادي من منعوهم عقود من الزمن
وعرقلوهم سنين من حياتنا وأوقفوا مراسيمهم أربع سنوات من أيّامنا وروّحوا الفرصة علينا
بوقتها واليوم راكضين يتصوّروا بالهليكوبتر".
وختم قائلا:
"كنا نقول لهم: اتركونا نبني، معمل الكهرباء، ومحطّة الغاز وسد المياه، وروحوا
تصوروا واعملوا التدشين بس اتركونا نعمل، "امّا انكم تمنعونا وتتصوّروا، اي الله
ما قالها! لهيك سنبقى نقاتلكم قتال المناضلين حتى نسقّط كل منظومتكم، وكما كان سقوط
امين صندوقكم المالي عظيماً، سيكون سقوطكم، يا ابناء المنظومة، حتمياً، وسيكون انتصاركم،
يا ابناء التيار، حتمياً".